اسرائیلی طیارے کی پاکستان آمد کے بارے میں متضاد خبریں

مہر خبررساں ایجنسی نے ڈیلی پاکستان کے حوالے سے نقل کیا ہے کہ پاکستان کے دارلحکومت اسلام آباد میں اسرائیلی طیارے کی آمد پر پاکستان بھر میں تہلکہ مچا ہوا ہے اور اپوزیشن جماعتوں نے پاکستانی حکومت کو آڑے ہاتھوں لیا ہے۔ پاکستان میں اسرائیلی طیارے کی آمد سے تہلکہ برپا ہے جس پر حکومت اور اپوزیشن کے درمیان لفظی جنگ بھی دیکھنے میں آئی۔

اطلاعات کے مطابق اسرائیل کے صحافی " ایوی شراف " نے 25 اکتوبر کو ایک ٹویٹ میں یہ دعویٰ کیا تھا کہ " اسرائیل کا طیارہ پاکستان کے اسلام آباد ایئر پورٹ پر اترا ہے جبکہ اس میں پائلٹ نے انتہائی چالاکی کا مظاہرہ کرتے ہوئے طیارے کو تل ابیب سے اڑایا اور اسے عمان میں صرف پانچ منٹ کیلئے اتارا جس سے جہاز کے کوڈ تبدیل ہو گئے اور پھر عمان سے وہ اسلام آباد پہنچا اس طرح پرواز عمان سے اسلام آباد کی ہو گئی " ۔ ادھر پاکستان کی سول ایوی ایشن نے تمام افواہوں کی تردید کر دی ہے جن میں کہا گيا تھا کہ اسرائیلی طیارہ اسلام آباد میں اترا ہے ۔

تفصیلات کے مطابق سول ایوی ایشن نے سوشل میڈیا اور ٹی وی چینلز پر چلنے والی خبروں کی تردید کرتے ہوئے کہا ہے کہ اسرائیلی طیارہ پاکستان کے کسی ایئر پورٹ پر نہیں آیا اور اس کی آمد سے متعلق چلنے والی خبریں صرف افواہ ہیں ۔